A NOSA LINGUA EN FORMA COAS PILULEIRAS!

 

Non perdades os vídeos feitos polo alumnado de Oratoria de 3º de ESO para promocionar as nosas Piluleiras! Grazas, Marta, Luna, Isabela, Amina, Rubén e Nerea💚💛

O "DICIONARIO DE GALEGO PARA BOOMERS" PREMIO "MIL PRIMAVERAS" AO MELLOR PROXECTO DE FOMENTO DO GALEGO

O Dicionario de Galego para Boomers, coordinado pola nosa antiga compañeira, Noemí García Rodríguez, acaba de gañar o Premio Mil Primaveras ao Mellor Proxecto de Fomento do Galego na Infancia e/ou Mocidade 2021. 

Todo un orgullo para o Leiras Pulpeiro e para o ENDL, que o apoiou e participou no proxecto de Noemí dende o primeiro momento. 

Mais temos dobre boa nova! O blog culinario Media laranxa🍊, tamén creación de Noemí e no que tamén participamos alumnado e profesorado creando receitas, gañou o mesmo premio na categoría de Fomento do Galego no Ámbito Sectorial.

En hora boa, Noemí, foi un inmenso pracer terte de compañeira e de que os teus dous traballos formen parte do proxecto do noso ENDL!👏👏👏👏👏👏

Noemí, na Biblioteca do noso centro o curso pasado

PiluLEIRAS DE GALEGO

Aínda non probastes as nosas PiluLEIRAS? Unha ao día👅💊,  dúas se cómpre💊💊, e notaredes os efectos en menos  tempo do que pensades. Volvede ler as propiedades das Pílulas de Galego☺ Non teñen contraindicacións.

Ante calquera dúbida, consultade co EDLG da vosa confianza 💛💚

CONCURSO DE MicrorrelatAs NO MES DAS ESCRITORAS

 

A que non sabiades que outubro é o Mes das Escritoras? 👩👵👧📝📚Nós tampouco. Por ese motivo ímosvos dar a lata  para que participedes no Certame SNL de Microrrelato en Feminino #MicrorrelatAs. Cada semana lanzarán catro palabras en feminino e vós tedes que enviar os microrrelatos a este correo inscricionlingua@coruna.gal.

Velaquí as bases:👇👇

• Hai dúas categorías: até 18 anos e maiores de 18. Asinarase o relato co nome, apelidos e idade.
• O concurso comezará o 4 de outubro e rematará o 29 de outubro. Faranse catro quendas semanais nas que o luns publicarán as palabras para incorporar. Seleccionarán o microrrelato gañador os venres a partir das 14h.
• Os textos serán en lingua galega.
• Só se poderá participar cun texto cada semana.
• A persoa gañadora unha semana non poderá seguir participando nas seguintes.
• O texto terá un máximo de 10 liñas escrito en letra ARIAL 12. Deberá conter polo menos dúas das catro palabras que se lancen cada semana.
• O xurado terá en conta a orixinalidade, a concisión, a forma do relato, así como a corrección gramatical e ortográfica.
• Os microrrelatos serán publicados nas redes (Facebook e Instagram) de Normalización do Concello de A Coruña, segundo os vaian recibindo.
• O premio consistirá nun lote de libros e produtos culturais.
• Se a situación sanitaria o permite a entrega realizarase de xeito presencial.
• Se o xurado o considera, poderanse conceder un ou varios accésits.

Así que xa sabedes, dádeslles a lata cos MicrorrelatAs!

PANDERETEIRAS A EUROVISIÓN!

Portada do disco

No ano 1968 o cantautor Joan Manuel Serrat fora elixido para cantar La, la, la,  a canción que ía representar España no Festival de Eurovisión. Uns días antes Serrat expresou a súa intención de cantala en catalán. As autoridades franquistas negáronse en redondo e o cantante foi substituído pola cantante Massiel no Festival, mentres que Serrat foi vetado e boicoteado⛔🚫 durante varios anos en TVE polo seu xesto de valentía e de compromiso co idioma. ✊

53 anos máis tarde, Olaia, Sabela e Aida, tres pandereteiras galegas, integrantes do grupo Tanxugueiras, impuxéronse como favoritas do público para representar España en Eurovisión coa súa canción "Figa". Todo un exemplo para sentir orgullo da diversidade lingüística do Estado español e de que o galego se normalice usándose como lingua nun Festival internacional tan popular entre o público.

Oxalá nos dean unha alegría estas raparigas✌🙌🍀🍀. Mentres, gozade do vídeo e da canción!!👏👏👏

PILULAS PARA DINAMIZAR ESTE NOVO CURSO!

Precisades de forzas para arrancardes neste novo curso?💪💪 O noso EDL ten unhas pilulas de lingua galega do máis efectivas 💊💊💊. Non tedes máis que ler o prospecto coas propiedades do noso idioma e veredes o ben que fan 😊😊. Este curso inauguramos a nosa conta de Instagram @leirantes na que tamén mencionamos a actividade do Equipo na Xornada de Benvida ao alumnado de 1º de ESO que organizou o o IES Leiras Pulpeiro.  

Á parte de participaren en diferentes actividades programadas para coñecer ben o centro que os vai acoller durante uns aniños, os nosos futuros alumnos e alumnas tiveron tamén a oportunidade de saber en que consiste o labor do noso EDL. Ademais de darlles unha dose de pilulas de lingua galega, levaron os prospectos en adhesivos por se se esquecen das bondades da nosa lingua💙👄. 

Foi unha xornada moi especial que se organiza por vez primeira no centro e que nos pareceu ideal para familiarizar ao novo alumnado co noso traballo. Parabéns e grazas á Directiva pola súa iniciativa e bo comezo a todo o mundo! Prometemos seguir argallando unha chea de actividades dinamizadoras, se a pandemia non nos freou o ano pasado, este aínda menos. Sempre con sentidiño! 🙌

Dúas madriñas de luxo

DE FESTA #ENREDANDOCOGALEGO!

O pasado xoves 10 de xuño os 34 alumnos e alumnas participantes no proxecto #enredandocogalego, organizado pola AELG e a Concellería de Cultura e Turismo de Lugo, asistiron á festa de despedida no Auditorio Gustavo Freire, onde xunto co alumnado do IES Muralla Romana recibiron palabras de agradecemento dos organizadores do proxecto e do tenente de alcalde, Rubén Arroxo. Todas e todos recibiron un estupendo agasallo 🎧 pola súa participación e ademais diso sorteáronse uns lotes de libros📚 e mais unha tablet💻 para cada centro. Tamén foron recoñecidos pola AELG os magníficos exercicios de creación literaria📜💡 que foron enviando algúns alumnos e alumnas que tamén recibiron agasallos especiais. Os premios levados nestes días atrás dan fe da canteira de escritoras e escritores en lingua galega 👅💙💭💙que temos no Leiras Pulpeiro. Así mesmo conmovéronnos especialmente as reivindicativas e sentidas palabras💓 que dedicou o noso alumno de 1º de Bac, Iván Dono Doñé á nosa lingua, que recibiron unha fonda ovación de todos os asistentes.

Como sorpresa especial puidemos gozar da actuación de Verto🔝🔝🔝 e corear o seus famosos rebolando por ti, rebolando por ti🎶🎸 e "Oye gayego"🙌

Pola nosa parte, querémosvos dar as máis sinceras grazas por participardes neste proxecto ao longo de 21 días nos que narrastes a través das redes sociais as vosas experiencias de falar o galego durante tres semanas en ámbitos nos que non adoitabades facelo. Este tipo de traballos teñen un valor sociolingüístico moi importante. Contamos convosco para vindeiras edicións!!😃😃

 

MÁSCARAS #PROBA O GALEGO

O curso pasado, parte do alumnado de 3º de ESO participou na actividade dinamizadora  #Probaogalego, que consisitía en elaborar eslogans publicitarios para promover o uso do galego. Despois de facer unha escolla dos mellores, decidimos colgalos no taboeiro do EDL e tiñamos previsto crear material de papelaría coas frases publicitarias. A pandemia e consecuente confinamento impediunos realizar a segunda parte do proxecto😐😔. Como colofón a este curso quixemos rematar a actividade encargando unhas máscaras cos eslogans para agasallar ao profesorado e persoal non docente, así coma aos alumnos e alumnas que participaron no traballo. O resultado foi espectacular👌👌 grazas ao traballo da imprenta gráfica Deseño.

Aínda que estades máis guapas e guapos sen a máscara alegrámonos de vos gustasen tanto coma a nós 😁😷 Por certo, a máscara do Leiras tamén traspasou as fronteiras galegas. Moi contentas de que che gustase , Andy! 👏

O NOSO ALUMNADO ENREDA CO GALEGO!

Falo en galego co chofer do autobús.🚌

Queda só esta semana🙈 para que remate o reto de 42 das nosas alumnas e alumnos de amosar nas súas redes sociais durante 21 días como é o seu día a día falando en galego en ámbitos nos que non adoitaban facelo😮😮. Damos fe de que están a facer un moi bo traballo. Todos eles crearon contas a propósito para participaren no proxecto #enredandocogalego e practicamente cada día colgan un vídeo ou unha imaxe con reflexións moi interesantes sobre as súas experiencias, desde relatar o que supón dirixirse por vez primeira ao condutor do autobús🚍 en galego co que falabas decote en castelán, ou contar a grata impresión😀 que produce que un camareiro ao que lle pedides en galego unha bebida vos responda en galego cando vos atendeu ao principio en castelán, ou ao revés 😕🍹; encherse de ledicia cando decides falarlle ao médico en galego e... non pasa nada, porque che responde en galego igual cás enfermeiras😄

Estas anécdotas, en apariencia banais, son reflexións sociolingüísticas moi interesantes e un paso importante para desbotar prexuízos sobre o uso do galego. O noso idioma, xa o demostramos co Dicionario para Boomers, adáptase a todos os ámbitos, contextos, idades... Tampouco non faltan recensións literarias, comentarios sobre cociña, deporte, música, a propia lingua, etc. 

A plataforma máis utilizada é Instagram, seguida de Tiktok (Jarno, en Jarnoengalego estanos a narrar durante unha viaxe para participar nun torneo, como é falar galego por primeira vez cos seus compañeiros)🙌🏆), Facebook ou ben, a través do correo electrónico.

Sinceros parabéns, a todas e todos, polo valioso traballo que estades a facer e que está a piques de rematar! Xa nos tarda que nos contedes ás conclusións ás que chegastes ao final do proxecto!👏👏👏👏💕

Interesante comentario de Cris e Suso sobre algúns camareiros....

Iván fálanos da impresión que lle causou a lectura de Follas novas📗

A conta de Cristina de 1º de Bac, para o proxecto!😍

Judit, Nerea e Patricia, na súa conta conxunta👍👍👍

Eva explícanos como se coce o pan.😋

XA ESTÁN PUBLICADAS AS RECEITAS GAÑADORAS DO CONCURSO MEDIA LARANXA!

Non o tiveron doado, abofé mais esta fin de semana Media Laranxa🍊 publicou as receitas premiadas no Concurso que anunciabamos a semana pasada. 

As deliciosas receitas gañadoras son a torta de queixo proposta por Diana Reija Fernández (1º de ESO); os coquiños, de Marta Vázquez Saavedra (1º de ESO), o rosco de laranxa de Eva Díaz García (4º de ESO) e a torta xeada de biscoitos, queixo e carambelo, de Andrés Martín Reija (4º de ESO). Tamén resultaron premiados os rolos de filloas con salmón dunha profesora do centro.

Premede en cada un dos nomes das receitas se queredes saber como se fan ou ben entrade no blog medialaranxa.fala.gal ou en Instagram.

Grazas a todos os/as participantes por compartiren en lingua galega as súas creacións culinarias!

E agora a facelas🍴 e a gañar quilos... de felicidade😋😋😋😋

COCIÑANDO EN GALEGO. CONCURSO DE RECEITAS.

Por se non tedes plan esta fin de semana, temos unha proposta para vós do máis apetitosa😋😋: participardes nun concurso de receitas organizado polo Media Laranxa🍊, o blog culinario que leva a nosa compañeira Noemí García e que ten unha chea de seareiros e seareiras por toda Galiza e fóra dela. 

É ben doado: enviade a vosa receita en galego xunto cunha foto ben bonita da mesma ao enderezo medialaranxareceitas@gmail.com antes do 22 de abril.

A receita gañadora será publicada nas redes sociais. 

Se queredes máis información ou ver as deliciosas receitas que nos propón Media laranxa ollade a imaxe da esquerda ou ben entrade no blog https://medialaranxa.fala.gal/  ou a través de Instagram. 

Lingua galega e comida, que marabillloso cóctel! 🍹

DÁ COMEZO O PROXECTO #ENREDANDOCOGALEGO!

Os organizadores e organizadoras do proxecto xunto coas profesoras 

do alumnado participante.

 Este proxecto, organizado pola AELG e as Consellerías de Educación e Cultura, vai contar con 42 alumnas e alumnos do noso centro que van pasar a partir do vindeiro luns, 19 de abril,  21 días explicando diariamente nas redes sociais co cancelo #enredandocogalego, as súas experiencias de como é falar galego durante tres semanas en diferentes ámbitos da súa vida cotiá (familia, aula, instituto, amizades, barrio, actividades de lecer...)👪👫🎒🎼🏃🏀🚴 

Hai total liberdade creativa, poden realizar vídeos, poemas, danza, cancións, debuxos, reflexións, microrrelatos🎶🎥🎦🎧🎭🎨💃...  todo en lingua galega. Unha experiencia incrible... 

Agardamos ansiosas a que pasen esas tres semanas e saber como lles foi e aos/ás participantes agárdalles unha festa final con agasallos polo seu traballo.🎉🎉

Quen anda tras deste proxecto? Pois ben, o escritor e investigador da mitoloxía popular galega Antonio Reigosa, as poetas e artistas María Lado e Lucía Aldao, o actor Anxo Lamelo e o narrador oral Lois Pérez . Nin máis nin menos!🔝🔝🔝  

Todos eles fixeron unha presentación xenial do proxecto con actuacións incluídas👌 Pillounos de sorpresa e botamos unhas risadas.  Así calquera se anima a falar galego e a participar no proxecto1

 

Oxalá queden eles contentos co noso alumnado, algo nos di que así vai ser e que van facer un traballo estupendo👍👍       

          

Anxo en pleno éxtase

Lois co seu móbil última xeración

    

O xenial dúo María e Lucía.

Na vida vimos unha presentación así!

Presentación do "DICIONARIO DE GALEGO PARA BOOMERS" na CASA DA XUVENTUDE

A alcaldesa de Lugo e outras autoridades deixaron por un día de ser boomers e aprenderon que eran as siglas RAG (Rir Ás Gargalladas)😂 ou que significaban palabras coma random, shipear, pana... 

O pasado venres 9 de abril, un grupiño de cinco alumnas e alumnos de 1º de ESO, que forman parte do equipo creador do Dicionario de galego para boomers, encargáronse de explicar ao público asistente nos actos do X ANIVERSARIO da Casa da Xuventude de Lugo, por que decidiron crear xunto coa profesora Noemí este dicionario virtual que está acadando unha grande difusión e acollida nas redes sociais e nos medios de comunicación.

Os nosos presentadores fixérono estupendamente e ao rematar a exposición proxectaron o vídeo feito por dous rapaces e unha rapaza de 4º de ESO dun poema de Rosalía de Castro, recreado en versión zoomer polo alumnado de 1ºBAC A, que xa vos presentaramos no Día de Rosalía.

A tormenta tan forte que houbo🌂⛆⛈ non impediu que o pasásemos en grande. Para relaxar os lóxicos nervios antes da presentación,  rebolamos nun baile coreografado pola escola de danza Gravity que anda xa rulando por tiktok!💃🙌🙆🙅

Aproveitamos de paso para vos amosar a reportaxe sobre o Dicionario, feito polo Servizo de Audiovisuais da Deputación de Lugo.

Mozos e mozas, parabéns, estivestes sensacionais!👏👏

Nun momento do vídeo do poema de Rosalía.

Rebolando

Intercambiando impresións coa Alcaldesa de Lugo

#EnRedandocogalego, 21 DÍAS CONVIVINDO COA NOSA LINGUA

Con esta actividade organizada polas Consellerías de Cultura e de Educación, xunto coa colaboración da Asociación de Escritoras e Escritores en Lingua Galega, un grupo de alumnas e alumnos do noso centro vai comezar un interesantísimo reto lingüístico, creativo e lúdico que durará tres semanas.

En que consiste? Contámosvos. Prestade anteción👂👀: o alumno ou alumna en cuestión terá que gravar cada día ou realizar unha publicación nas redes sociais (Instagram, tiktok...) cun mínimo de 130 caracteres, falando da súa experiencia cotiá de usar a lingua galega en ámbitos onde non a adoita usar ou onde si a usa (famila, amizades, instituto, barrio, aldea...). Cada entrada terá que ir acompañada do cancelo #enredandocogalego.

Se sodes creativos/as podedes facer vídeos literarios, musicais, debuxos, monólogos teatrais, performance... o que vos guste, sempre en lingua galega.🎨🎰🎤🎬🎧🎦🎪🎼

Se non vos apetece utilizar redes sociais, podedes enviar creacións literarias🔖 co mesmo cancelo a este enderezo electrónico: escoladeescritoraseescritores@aelg.org.  O formato pode ser tamén variado, físico por escrito ou dixital en vídeo. Poden ser poemas, reflexións, microrrelatos, creacións audiovisuais, caligramas, etc. Seguro que vos saen cousas fantásticas!🔆👌

Se hai máis interesadas/os, facédenolo saber no Departamento de Lingua e Literatura Galega. Imos ter unha reunión informativa cos organizadores da actividade o vindeiro 7 de abril no Salón de Actos ás 10.10h👈, na que lles explicarán ao alumnado participante máis polo miúdo en que consiste a mesma. Tamén iremos enviando información por correo electrónico a quen forme parte deste proxecto. 

Despois das sorpresas que nos dades con outras cousas que levades feito, xa nos tarda vervos en acción #enredando co galego!!🔝🔝

E lembrade, haberá premios e festa final!🎉

E RULA O DICIONARIO PARA BOOMERS!

 

Con máis de 700 seareiros, o Dicionario de Galego para Boomers, está a acadar un enorme éxito máis aló da nosa comunidade educativa. Algúns medios de comunicación e coñecidos persoeiros da nosa cultura, institucións, profesorado e alumnado doutros centros valoraron o estupendo traballo feito polos alumnos e alumnas dalgúns grupos de 1º, 4º de ESO e 1º de Bacharelato do Leiras Pulpeiro.  

Todos eles seguen a elaborar voces seguindo os parámetros dun dicionario (clase de palabra, definición e exemplo, diferentes significados). Nas imaxes podedes ver os resultados do seu excelente traballo.👌📖

Algún grupo de Bacharelato divertiuse volvendo cantigas de amigo do galego medieval á xerga dos zoomers, con resultados sorprendentes e cómicos😅.

Lembrade, boomers, se queredes entrar no mundo das redes sociais e dos vídeo-xogos da xente nova, visitándenos en Instagram!☝👀